HRIATNA KHAWNVAR

KRISTIAN THALAITE LEH INCHEINA

By T.Lalenmawia 

Thuhmahruai 

Kan hun tawn mek leh hman mek hi Postmodern hun a ni tih kan hriat a pawimawh hle. Mizote  zingah pawh Postmodernism hi a mi khual tawh lo hle a. Hmanah chuan hmeichhe kekawrtlawn  ha chu mi leplera ngaih an ni a, tunah chuan nula, nu pawhin a duh leh a ha ang a, a duh loh leh a  ha lo mai a, a thu thu a ni. Standard a awm tawh lo va, kan living style hi youth culture-in a thlen  phak chin chin a ni mai. Kan fashion hi chhût vang vang ila eng ram leh hnam fashion nge kan  copy? Dik tak chuan eng ram leh hnam fashion mah kan copy-in kan la lut hran lo; tunlai  khawvel hi fashion khawvel a nih vang mai a ni. Fashion khawlvelah hian ramri a awm thei tawh  lo va, Biak ina Bible ken aiin mobile ken luhte pawh kan incheinaah kan la seng lut hial a  rinawm a ni.

Changkanna leh Christian lifestyle 

Changkanna hi rilru puthmang leh hawiher (Attitude & Moral) hmanga neih theih chauh a ni.  Tunlai inchei dan uar ber ber hmangin nalh ti takin inchei chhuak ve mah ila, vengchhung pelah  emaw mi changkang dik tak, a khawsa thei chin te nen khawi hmunah pawh kal khawmin, awm  ho mah ila, kan incheina te, kan hmel te, kan thil neih te hian an rilru a la peng pha eih lo va an  lo ngaihsak (Interest) vak miah lo. Lehkha thiam lamah leh hausak lamah rual pawl silo, mawi  leh tha hre uchuak thei, nalh tak taka inchei, in leh lo chhuanawm tak nei lem silo kan tam ta hle.   Pathian thu awih tlat a, kan nuna kan dah Lal ber hian kan chungnung zawk a ni. Chu chu a ni  Christian Lifestyle aia changkang a awm theihloh na chhan chu. Intellectual Circle kan tih te ho  pawh hian an mahni aia nalh, lehkha thiam leh hausa leh fing leh hmeltha te hi an awt tawh bik  lo. Mahsela, Christian Lifestyle neitu te hi an tluklo a ni tih hi an pawm (admit) thlap thung. Inti  changkang, incheina uar ve tak, Inkhawm nachang hre silo, inla ve takte hi a thing ru fu zawk a  lo ni. A ruka thing ho hi chu keimahni kan inhre chiang hlawm khawp ang. Korn Guitarist  piangthar ta Brian "Head" Welch (nu-metal band) khan ti hian a sawi “Eng Changkanna leh  Ropuina  mahin Isua Ngaihsak tute a lehpel theilo” a ti. A nih nang, Christian Lifestyle neih  nge I duh a ruk a thing nih?

Thangthar nun leh fashion 

Information Technology changkanna leh mass media thiltihtheihna avangin Fashion hi thil  danglam chak pawl a ni awm e. Tunlai thalaite hi U.S khawpui Washington D.C Kawtthler lun  lai berah pawh laitual mawi dawn mah se, an thawmhnaw inbelte hi a zahpuiawm hauh tawh lo a  ni. Amaherawh chu, media kal tlang a kan hmuh, kan hriatte hian a tha lam aiin hringnun  chhiatna thlalerah min hruai thleng thei a. William Roedy-a, Europe-a MTV hotupa chuan,  “Paris khawpuia tleirawl kum 18 mi chu a nu leh pa aiin New York khawpuia a tleirawlpui  kum 18 mi nen an in ang zawk,” a ti. Sap hla hits kan hmelhriat a, an  mawngkawkehkak lan rualin kan lo ti lang ve thuai a. Koreanho nen hian hnam khat ang maiin an fashion, an Hair style  te chuan min chiah hnehin copy a hlawh nangiang mai. Tlangvalte pawh chal hma sam, mit leh  lam khuh vekte, phirsi mang kheng te, Emo style an tih phei chuan kan tlangval thenkhatte phei  chu a ti nu zo vek tawh a ni lawm ni? Hmeichhe hak tur niawm tak tak hi mipa-in an ha a, make- up hmeichhe hman tur chauh a kan ngaih thin kha an hmang ve duh ta zel mai bawk si. Kan  nulate bengbeh duh zawngte hi kual lian mangkheng, hnar beh te chumai a ni lo, mit ko tlang leh  hmui thlengin an beh a, hmun khatah mai an duh tawk lo, a leng thei tawpin an beh ni berin a  lang. Nu leh pa thenkhat tan chuan hriat thiam an har reng a ni. Mahse, heng kan sawi rual hian  an vai chuan an ni hauh lo. 

Sakhuana leh Culture   

Judaho hi an hnam dan leh an sakhuana hian inzawmna nghet tak a nei a, an culture-ah an sakhua  a tel a, an sakhuaah an culture a tel bawk a, lakhran hleih theih a ni lo an ti. Mizo hnamah erawh  kan hnam thuam leh kan kristianna inhmeh lo thil tam tak a awm awm e. Mahse, kan sakhuana  hian kan hnam nun leh kalphung a kalh tihna erawh a ni lo. Thil buaithlak leh rilru nat thlak tak  pakhat chu hnam dang unau ten kan hnam silhfen min tawm zo ta hi a ni. Kan mipa kawr phei  chu an nula ten an duh leh an ha a, an duh leh an feng a. Inchei dan ringawt atang chuan eng  hnam nge kan nih hriat kan har ta hle mai. Nula thenkhat-in Thangchhuah puan, tawlhloh puante  chu ‘One Set’-ah emaw an thui de re a. Mipa thenkhatin ngotekherh chu kawrah an thui a,  hmeichhe thenkhat lahin an bih common bawk a. Incheina chungchangah hian eng hnam pawh  hian hnam incheina Traditional Dress an nei ngei a, mahse heng an traditional Dress hi chu hnam  zia an pho lan duh chang tih mai lohah chuan an ha reng lem lo. 

Thalaite inchei duh dan hi Kohhran hian hnawl sak ta tlat zel ila, kohhran pawnlama an duh dan  ang taka an inchei theihna hmun lam  an pan daih mai ang em? Min run mektu khawvel  hmasawnnain thalaite nundan a thlak zel hi dan tuma phet phet ai chuan Pathian hman tlaka  kawihher dan hi ngaihtuah zawk ta ila, Kohhran hian a thatpui zawk mai lo ang maw? Khawvel  pum thlirin kan Kristianpuite zel hi inchei nasa an ni zel hian thil thlir dan thiam min harsattir a  ni. Pathian biak Ina khup pel rawka chhing thawm hnaw inbel  hi a mawi lo va, a theih hram  chuan Pathian biaknaah chuan a zahawm tur a ni.  Thil hi a awm tawk leh chin tawk a awm, uchuak lutuk chuan thatna a neih sawi tur a tam lem lo  hle mai. Hnam nunphung leh tih dan thate Biak In-ah kan seng lut dawn a nih pawhin a chin  tawk hriat thiam a, hrilhfiahna pek thiam a pawimawh. Kan sakhuana piah lamah kan hnam nun  thlengin a zahawmna kan pho lang thei ang. 

Thalaite inchei zahawmna

Kan incheina hian eng ang mizia nge kan nih thui takin a hril a, kawng tam takin a lantir a ni.   Chuvang chuan incheina hi kan namnul mai mai tur a ni lo. Kan neihin a tlin emaw kan thei a nih  chuan zahawm taka inchei hi Biak In chhungah chauh ni lovin, khawi hmunah pawh a tha.  Mahse miin a tlin lo a nih tlat erawh chuan hnawl ngawt chi a ni lo. Incheinaah hian a hmun leh a  hun thliar thiam a ngai khawp mai. Inkhawm leh pui punnaah hi chuan a zahawm thei ang bera  inchei hi a fuh fo. Chanvo pawimawh nei tur tan holam lutuk a inchei hi a mawi lo a, a zahawm  lo thei a ni. Kan chanvo leh kan Inkhawm chhan hre reng a, kan ngai pawimawh a ni tih leh kan  zah entir nan kan neih tawk theuhah uluk, fai leh thianghlim taka inchei thin hi a mawi ber a ni.  A pawimawh berah chuan kan incheina avangte hian kan rilru hi lepchiah lo se Kristian kan  nihna hi a zahawm ngei ang.

  

Tlangkawmna

INCHEINA chu zalen a ni a, Tu mahin chutin khatin inchei rawh kan tih theih awm lo mah se,  incheinate hian rilru a tha lo zawngin a hruai thei a. Chu lo rengah Kristian kan ni a, kan incheina  a hleihluak lutuk chuan kan kristianna leh kan rinna nen pawh a in hmeh lo. Chhungkaw  khawsak phu loha thawmhnaw manto inbel te, chhungkaw khawsak paw’n lo phu teh reng se,  thawhchhuah nei hauh lo chhungte thawhchhuah sa ring a in la lian vak mai te, lo do teh chiam  aiin hman tangkai tum zawk mai ang u. Chutih rualin keini hnam la naupang tak, mize nghet  pawh la nei fumfe hlei thei lo, a changa Gothic, a changa Emo, a changa Bamboo Dance tih ang  vela thle kual mai mai tan hian Malsawmna nge anih anga Anchhia tih I ngaihtuah chiang ang u.  Kristian thalaite tan incheina mawi ber chu thui loh kawr (the robe) ngei a in thuam hi a ni. He  khawvel fashion tharte aiin a hlu zawk a, LalIsua thuam famkim a inbel ai a kan Kristianna nena  in hmeh a awm thei lo. A hmutu leh thlirtu tan LalIsua hmel kan nunah a lo lang zawk dawn a ni.