HRIATNA KHAWNVAR

Pathan Beisei Rawh

T.Lalenmawia

Bible chang innghahna

Thuthlung hlui         : Sam 84:4--7, Sam 42:1-11

Thuthlung thar         : Mathaia 5:3-12, Rom 5:1-8

Thuhmahruai

Zanina kan thupui tur atan “Pathian beisei rawh” tih kan thlan ve tawpna chhan chu Kan nunah harsatna te kan tawk thin a. Kan kawngte a lo thim a, hlauhna ten thla an zar a. Hlawhchhamna te chuan min ti hrehawm chang a awm thin. Kan lungngai a, kan beidawnna kan tawk fo. Muanna tam tak kan chan fo a, lungngaih mangan kan tuar thlawn thin. Kan rilru a buai a, chu chuan kan rinna a ti chak lova; hrehawm tin reng rit min phur tir thin a. Sual lam kawngah ke kan pen a, bansan thei tawh lo hialah kan inngai fo thin. He tiang hun a lo thlen hian kan mamawh ber thian kan innghahna Pathian chauh beisei a tul zia han sawi ve ka duh a ni. Pathian hnena kan innghah chuan amah chu nitin kan nun zawnga kan chakna ber a ni.

Awle, Thuthlung hlui hunah khan Juda saltâng-hote khan Jerusalem-ah chauh lo chuan Pathian biak theih tûrah an ngai lo va. Chutiang deuh chuan, II Lalte 5 ah Suria sipai hotu Naamana phar chanchin kan hmu a. Naamana chu Jordan luiah vawi 7 a inhnim a, a tisa chu nausen tisa ang mai a lo ni leh a; a lo thianghlim leh a. Naamana chuan, “Ngai the hei, Israel ramah ngawt lo chuan leilung zawng zawngah hian Pathian a lo awm lo ve tih ka hre ta,” a ti a. Ti chuan, “sabengtung pahnih phur lei mi laktir rawh,” tiin a dil a nih kha.

Chu tiang chuan, Babulon rama an saltânna hmun aṭangin Jerusalem an ngai ngawih ngawih ṭhin a. He Sam ziaktu pawh hian a saltân hrehawm tihna chuan nasa takin a pawt kun a, Pathian ngei pawhin a theihnghilh ta hialah a ngai a ni. Chutianga hrehawm ti taka a van ruai ruai lai chuan Pathian, amah tidam theitu beisei tûr a awm a ni tih a hre chhuak leh a. Kun reng mai lova tho chhuak tûrin amah a insâwm ta zâwk a ni.

Judate hian Jerusalem khawpui hi an ngaina em em a, an kut pawimawh a lo thlen apiangin an tlawh ngei ngei thin a. Jerusalem-ah chuan Temple a awm a, Temple awmna tlang chu “Zion tlang” “Pathian tlang” tiin an vuah a; chutah chauh chuan Pathian hi awmin an ring a ni. Rev. Chuauthuama buatsaih Bible dictionary kan en chuan ‘ZION’ tih awmzia hi hriat chian theih a ni lo a, Arabic tawng chuan ‘tlang chhip’ tihna emaw a ni mai thei a ti. Solomona lo lal hnuah khawpui chu hmarthlang lamah an zauh va; Temple chu khawpui lu tlang chhipah  chuan a sa a. Chu Temple awmna tlang chu ‘Zion Tlang’ tih a ni ta a. Chuta tang chuan Zion tih awmze thar a lo piang chhuak leh a; Zion tih chu Jerusalem khawpui sawina atan an hmang leh ta bawk a. Chumi hnuah chuan Zion tih chu Israel hnam pum pui sawina atan an hmang leh ta zel a ni.  Ti chuan, Jerusalem an panna kawngah hian “Baca ruam” “Tahna ruam” a awm a. Jerusalem pana kal khualzinte chuan he tahna ruam hi an paltlang thin a, helna kawng dang a awm lo a ni. Chu hmun chu thlaler ram ro a nih avangin a lum em em a, Hemi ruamah hian khualzinte an chau thei hle a, tui an mamawh a, chawlhna daihhlim an ngai thin a. An tha a zawi ngawih ngawih a, hma lam pan zel an huphurh a, kir leh mai duh rum rum chang pawh an nei thin niin ziaktu thenkhat chuan an sawi. Amaherawh chu, chutia an chauh lai taka an infuihna thu chu, “Nakinah chuan Zion khawpui kan thleng ang a, chutah chuan he tahna ruama kan lungnaighna hi hlimna leh lawmna hmunah a la chang dawn a ni” tiin an in hnem thin a. Hlimna ruam thlen hun thlir reng chungin hma lam an pan hram hram thin a ni.

He zin kawng hrehawm tak hi hre reng chungin Sam ziaktu chuan, Sam 84:6-7 ah chuan, “Tahna ruam chu an zawhin tuihna awmnate an siam thin a, chakna atangin chak lehzualnaah an kal thin a, Zion-ah Pathian hnenah an inlan theuh thin” tiin Khualzinte tan he hla hi a lo phuah a ni.

****************************

Pastor Henry Morrison te nupa chu Africa ramah Missionary-in an hun tha zawng zawng  kum tam tak chhung an  hmang zo a. Aan hriselna te a ṭha vak tawh lova, chu mai bakah pension lawmman tak ngial pawh an nei lo va. An rilru a hnualin hlawhchham intihna leh beidawn rûknain an khat a. Ti chuan, America ram lamah chuan an haw ta a. Chutih lai tak chuan America ram President Theodore Roosevelt-a zin chu a haw ve bawk a,  hmuak tu tam tak a nei a; chanchinbu mite chuan phek hmasa ber an luahkhah tir chuai chuai a. Mahes, missionary te nupa lo hmuaktu chu tumah an lo kal tlat lo. Pastor Henry Morrison-a rilru chu a na em em ta mai a. Engvangin nge ka hun tha zawng zawng rinawm takin Pathian rawngbawl nan Africa ramah ka hmangral a. Tunah tuman min ngaihsak ve bawk si lo tiin a rilru a na a, Pathian hnenah a vui a. Mahse, ‘Ka fapa, nang chu in i la thleng hleinem. I in i lo thlen hunah chuan vantirhkoh tam takin an lo hmuak dawn che alâwm‘ tiin Pathian aw a hre ta . Tichuan khawvêl hi kan in anih lohzia leh kan khualzinna mai anih zia ka hre chhuak a ka lâwm lutuk, tunah chuan ka hahdam ta e” a ti ta a ni.

Ni e, He khawvel hi kan khualzinna ram mai a ni a, kan ramhlun tur a ni lo. Khawvel a nih angin famkim lo, anchhedawng, buaina ten thla an zarna a ni a. Chatuan ram hlun tur kan la thlen hma hi chuan sual vanga kun reng hi a awl thin ngei a ni. Keini Kristiante pawh he khawvelah Van ram pana kan kal mek lai hian chhumte a lo zing fo thin a. Lungngaihna, manganna ten min chimbuai a. Sual vanga lungngaih chang te, Khawvel thilte avanga kan rum chang te, a sang zawk beiseinain hmun a luah a. Kan inchhungah sum leh pai harsatna avang te, ruih theih thil vang te, inchhungkhur boruak a that loh vanga kan rum chang a awm ang. Kan hna thawhna a tluan loh avanga kan rum chang a thleng thin a. Chu ti ang chuan, Zion khawpui kan panna kawngah hian he tahna ruam hi kan paltlang ngei ngei a tul ve thin a ni. He tahna ruamah hian kan lawmna leh hlimna tuihna a kang a, kan phurna leh tuina a lo chuai zo va, kan chau ngawih ngawih thin a ni. Hemi ruamah hian inkhawm leh tawngtai kan peih lo ngawih ngawih a, chhandamna kan ringhlel rum rum a ni. He tahna ruam atang hian kan hma lam kan han thlir a, a ro tawlh tawlh dawnin kan hria a. Kan kalsan tawh lam kan han thlir leh a, a lo hring dup mai si a. Thupuan 2:4 ah “I hmangaihna hmasa ber kha i ban tak avangin” a tih ang deuh hian beidawnna, lungngaihna ten kan chungah thla a zar a, khawvel thilte kan thlir a, a lo hring dup si a; he tahna ruam atang hian mi tam takte chu khawvel lamah kan kir leh thin a, kan hmangaihna hmasa chu kan bansan leh thin a ni.

Ti chuan, kan hun tawn mek chu thlaler ram ro, tuihna awm lohna hmun niin kan hria a. Chhandam kan nihnate pawh kan ringhlel rum rum mai a, sual a chak sawt a; sual kawngah min hruai lut thin a. Mawh puh tur kan dap a, thil nawi te teah kan phunchhiar a, miten min khak zeuh lahin kan vui awl em em bawk a. Tuipui sen atangin kan chhuak a, Mara hmun kan thleng a, kan tui halna te avang chuan kan inkhawngaih em em a, a tui chu kha mahse beidawna ruamah chuan kan in ta a.  

Eng vanga beidawng thin nge kan nih? Eng vanga lungngai thin nge kan nih?, Heng hun a lo thlen hian kan rinna chu khawih chetin a awm a, a chak loh phah fo thin. Sual setana chuan remchangah a hmang a. Kan chak lohna kan panna laiah tak a tui tuiin min chawm a. Sualin min bei a ka chau a, hnung tawlha hawi kir a awl thin.

He khawvelah hian hlim taka kan nuih laiin tahna zan thimin min nang thut thut a. Thinlung hah ngawih ngawihna tur a tam a, kan taksain natna a tuar a, thihna avangin kan rum vawng vawng thin a. Manganna vawr tawpah chuan kan finna leh thiamnain awmzia a nei lo va, Lalna leh thuneihna chuan min tihlim tawh lova, sum leh pai hmangin hlimna kan lei thei tawh hek lo. Beidawnna hi setana thang a ni a. Bei a dawn tawh chuan ngaihtuahna hi a tawi terh mai a. Chu chuan rilru hrisel lo min put tir a. Nun thlakhlelhna min neih loh tir a. Mahni in tih hlum duhna rilru hial min put tir a. A then tam takin an nunna hial an lak phah tawh bawk a. Belh tur Pathian chu belhna chang hre lovin kan ngaihtuahna chuan ka khawhmuh a ti fiah lova, kan mit a del a. Pathian hi a awm tak tak lo anga rinhlelhna kan nei rum rum thin. Mahse, Pathian chu a pangngai reng a. Hetiang hunah pawh indawm kun mai lovin, Pathianah beiseina neia tho chhuak tûr kan ni zâwk a ni. Bible-ah ‘Khawvel hi hmangaih suh ula, a chhunga chengte chu awt hek suh u’ a ti a. Khawvelah hlimna zawngin kan tlan thin. Mahse hei hi a pawimawh zawk “Ram zau taka Lal ber ni mah ila sual thunun kan nih si chuan” chatuan nunna kan chang zo dawn lo a ni.

Khawvel hi innghahna tlak a ni lo

George Matheson-a chu mit tha vak lo a ni a, chutichung chuan, Scotland rama University pakhatah a zir zo va. A nupui hual nen an inneih hun pawh a hnai hle tawh a. Nimahsela George Matheson-a chu a vanduaina belhchhahin a mit chu a del ta hlauh mai a. A nupui hual pawh chuan, mitdel tana dam chhunga inpek chu hrehin a bansan leh ta a. A nupui hualin a bansan phahna khawp piansualna a tawh takah chuan mahni inkhawngaihnain a khat a. Mihring inhmangaihna rintlak lohzia te, hmangaih berte pawh tuk khat thilah kan hmelma an nih leh theih dante chu a nun atang chuan a hmu chang hle mai a. Nimahsela, a mittui kar atang chuan hmangaihtu dik tak hmel a hmu fiah ta a. Hmangaihna chuai ve thei lova hmangaihtu chu Lal Isua chauh a ni tih a hmu chhuak ta a.

Facebook-ah nula pakhat chuan, “I tel lo chuan ka dam zo lo ang min titu te kha tun thlengin Pathian zarah an la dam kim vek,” a ti a lawm. Khawvel hi innghahna tlak a tling lo a. Khawvela tuikhur chawi tur zawnga tlan thinte hian a tui an in thei ngai lo. He leiah zawng ringtu te sual avanga hliam tuarin hnehchhiah leh chau takin kan rum thin. Lei nun hi chu a hlun lo va, mite hriat lohva thinlung hah ruk ngawih ngawihna tur a tam hle a. Natna kan tawk thut thut a, thihnain kan chungah thla a zar reng a, hmangaihtu leh hmangaihte inthenna ram mai a ni.

Pathian beisei chu damna a ni

A chung kan sawi tak ang hian khawvel hi innghahna tlak a ni lo. Kan khualzinna mai a ni. Pathian beisei lotu te hi a damchhung ni a rei ngai lo. Kum 2005 khan Brazil a khaw pakhat campinas-a thian za ho chu intihlima hun hmang turin an in sawmkhawm a. An thian nu Nu chuan chu tia rui chunga a fate inkhalhchhuak tur chu a ngaihtuah hle mai a. A fanu Car seat-a thu tawh chu a banah vuanin, ‘Mami, Pathianin awmpui che u rawh se,’ a ti lawm lawm a. A fanu chuan, “Pathian chu savawm bawm a a chuang a nih ngawt loh chuan kan leng tawh lo,’ tiin a chhang a. A hnu lawk darkar 2/1 lekah chuan accident rapthlak takah an thi phiar a, an Car chu a chhe hneh khawp mai. Eng car nge tih pawh hriat theih loh khawpin a chhia. Mahse mak tak maiin a savawm bawm chu a him pial a, Police-te pawhin chutiang a a savawm bawm engtin mah chhe khem miah lova a him ngawt theih na chhan chu an hre zo lo. Chu ai pawh a la mak em em zawk chu a savawm bawm chhungah chuan artui plate khat an lo phur a, artui chu pakhat mah a keh miah lo!!!

Zirtirte kha Lal Isua nen lawngah an chuang a. Thli na takin a lo thawk a, an lawng chu a pil mai dawnin an hria a. Zirtirte chu an hlau em em a, Lal Isua mu lai chu an kai tho ta a. Thlipui chu a hau reh thu bible ah kan hmu a. Lal Isua muhil lai an kai tho a, thlipui chungah thu a nei a; hlauhawm a kiang ta. Zaninah hian hei hi ka sawi duh a ni. Manganna kan tawh changte, lungngaihna kan tawh changte hian Pathian hi eih zo tur khawpin kan au tawh em? Kan hminga min autu an awm miah loh chuan kan ‘eih’ mai mai ngai lo. Kan eih a nih pawhin kan bengchhe ri mai mai kan ti thin. Chu vangin, Pathian hi kan beisei loh a, kan auh miah loh chuan a ‘eih’ dawn miah lo tih hi kan hriat a ngai. Tahna ruam kan zawh changte hian hnunglam hawi kir leh mai lovin Juda ten Zion tlang an thlir ang khan keini pawhin Pathian beisei ila kan dam nan i au ang u.

Eng anga sual pawh ni la Pathian chuan min ngaidam duh reng a. Sinai tlang danah chuan ‘Sual man chu thihna a ni a.’ Dan avanga thiam chan tumtute tan chuan damna a awm lo a ni. Mahse, Kalvari tlang danah erawh chuanin misual chu khawngaihna avanga chhandam a lo ni. Tirhkohte 16:31 “Tin, anni chuan, “Lalpa Isua ring la; tichuan, chhandamin i awm ang, nang leh i chhûngte nên,” an ti a. Titanic lawng kha Pathian meuh pawhin a tih chhiat theih an ring lo va mahse vur tlang mai pawhin a ti chhe thei a nih kha. Awle, Tuna kan chuan mekna lawng hi a him em? Tuna kan nun hman mekah hi ngaihtuah ila, tunah hian boral dawn ta ila chhandamin kan awm ang em? Kan thlarau nun a dam ang em? Lal Isua kan nei tawh em? tih hi kan in enfiah a ngai a ni. Kan sawi tak ang khan Lal Isua nei lotu, kan zin kawnga Pathian beisei lotu te nun chu thihna a ni. Chhandama kan awm theih nan Pathian hi i beisei tlat ang u. “Chu Kraws chu pawmin ka vuan zel ang, thlafam dairial ka chan hma loh chuan, thlah lovin ka vuan tlat zel anga, Lal lukhum hluah ka la chan ang. 

Pathian remruatah innghat rawh

Nikhat chu lawng chhiat avangin mi tam tak chu an thi a, mahse van neihthlak takin mi pakhat hi a dam chhuak hlauh mai a. Thliarkarah chuan harsat tak chungin a in hai chhuak thei hram a, tuma awm lohna hmunah chuan amah chauhin mal takin a awm ta a. Nitinin Pathian hnenah chhanchhuah a nih theih nan a tawngtai thin a. Mahse, chhanna a hmu si lo, a beidseina te chu a bo zo ta a. Chu mai a la ni lo! Nikhat chu ei tur zawnga a vah chhuah laiin a theih ang anga a lakkhawm, hah taka a sak ve; thli leh ruah laka a inphenna a chenna bukte chu a lo kang hluah hluah mai a. A thin a rim em em a, Pathian hnenah chuan a vui ta hial a. Zing a lo ni a, a awmna thliarkar pana lawng lo kal chu a hmu a. Amah chhanchhuak tura lo kal lawng a lo thlen chuan mak tie m em hian, “Engtin nge, chhanchhuah a ngaihzia an hriat theih?” tiin a zawt a. Chung mite chuan, “Tanpuina meikhu i chhuah (signal) kha kan hmu a, kan rawn pan nghal che a ni,” tiin an chhang a. A chunga vanduaina lo thleng avang chuan Pathian chu nasa takin a dem a, mahse a damchhuah theihna atan a lo tha zawk si. Rom 11:34 ah “Lalpa rilru chu tu nge hria a, tu nge a remruat saktuah tang tawh?” tih kan hmu a. Hla siamtu chuan

I chungah khua lo durin ringhlel suh la,

Pathianin engkim chungah ro a rel a;

Khaw dur, khaw thiang nenin lei a lo tha si,

Mihring siam that nan khaw dur a ngai a ni’ tiin

Kan chunga vanduaina thleng anga kan ngaihte hi amah kan pawh theih nan a lo ni zawk thin. Eng dinhmunah pawh ding ila Pathian remruat hrethiam tur chuan kan tawngtai zawk tur a ni. Khawvel a kan awmchhung chuan sualna te, lungngaihna ten thla an zar thin. Mahse, hrehawmna lo thleng hi amah kan pawl theih nan min thlan sak a lo ni reng thin. Tuarna leh channa lo chuan ringtute nun a thang thei lo. Mifel Joba meuh pawh Pathian chuan setana khawih nat a phal a nih kha. A chhungte leh a neih zawng zawng an ral vek hnuah pawh ‘Ka tlantu chu a nung tih ka hre si a’ a la ti thei a nia. Pathian hian kan thatna turin engkim min ngaihtuah sak thin a. A remruata innghat ngamtute nunah chuan vuina tur reng a awm ngai lo.

Pathian beisei rawh

Hei zanin hi Champion League final zan a ni a. Liverpool leh Tottenharm Hotspur te chuan final an khel dawn a. An ni team 2 te final thlung tura an zinkawng hau tak zia hi. Mahse, khawvel miten tih theih tawh loh a kan ngaih a, thei tur chuan miracle (thil mak) a thlen a ngai an tih laiin mahse a thleng tlat si. Liverpool chu goal 3 a an chak loh hnuah an khingpuite an lehthal leh thei tlat a. Tin, Tottenharm Hotspur pawh nise chak lo hmasa zawkah tang mahse an khingpuite an lehthal thei tlat mai. He ta ropui ka tih em em chu Tottenharm Hotspur tana chakna goal 3 ngawt thuna a team te fianal hruai thlengtu Lucas Moura hi a ni. Lucas Moura chuan, Luka 1:37 “Pathian thuchhuak reng reng thiltithei lovin a awm lo vang,” tiin Pathian nen chuan engmah theih loh a awm lo tiin instagram ah a post a. A va ropui em ve!

Nun beidawng leh chau vin kan rûm a, beisei tûr reng nei lovin kan awm thin. Kan nun hi harsatna chhûm dum ang a chhah in a tuam lai a awm a, dam chhûng a awm hlen tûr erawh a ni lo. Beidawnna hian rah tha engmah a chhuah lova, beiseina nei hram hram a, chhel taka tuar hram hram tu te chauh in ram ropui an thleng thin, kan tawrhna te hi kan chanchin ti ropuitu an ni. Mihringte nun hruaitu leh innghahna ber chu BEISEINA hi an ti. Kan nitin awmdan awmze neih tirtu leh kan khawsak phung min siam saktu bulpui ber chu kan beiseina hi a ni a. Chutih rual chuan beisei tur nei tawh lote chu mi vanduai tawp an ni an ti. Khawvela mi khawngaih thlak ber leh hlauhawm ber chu mi beidawng, beisei tur nei tawh lova in hriate hi an ni. Tun laiah a bik takin thalaite zingah ‘DEPRESSION’ a tam hle a. Depression chu Dr. Lalhrekima chuan ‘Rilru hrisel lo’ a ti mai a, a tawmpuiawm khawp mai. Beisei a bo tawh chuan ngaihtuahna a tawi a, pawisak engmah a awm tawh lova, Engkim hi a tawp vek mai niin inhriatna kan nei a, dam chhuah zawh pui theih kan inring lo ta thin a. Ngaihtuahna tha lo hrang hrangin min tibuai a. A chang phei chuan, “Pathian in min hrem, Pathianin min kal san, Pathian kutthlakna a ni,” kan ti a. Rilru a hrisel thei ta lova ngaihtuah loh tur kan ngaihtuah a, Depression veite chu a tawpah mahni in ti hlum an tam hle a, a pawi tak zet a ni. Hei hi keini thalaite pawh hian kan hriat a tha khawp mai.

Mahni nunna lak hi a damna a ni lo a ni. Natna khirh tak kan chunga a lo thlen vangte, retheihna leh tlakchhamna lo thleng thinte, beidawnna khur thuk takah min chim pil mekin, hmalam beiseina eng nei tawh lo hialin kan inhira a ni thei e. Sual vanga beidawnna i chungah a thleng mek em? Nangma thil lo tih tawh avangtein beidawnna khurah i lut mek a, beiseina reng nei tawh lo leh kun ngawih ngawihin i nun a khawhar a ni thei e. Eng vanga he ti ang awm nge ka nih? tiin i inzawt fo thin em? He tiang anga kan awm a, rilru hrisel lo kan put tawh chuan kan dam lo a ni. Mi bawrhsawmte chuan doctor an ngai a, mi hriselte chuanin an ngai lo. Kan damlo a, kan bawrhsawmin doctor te kan pan thin a. Chu vangin, kan thlarau a dam lo a nih chuan ‘Ti damtu Lal Isua’ i pan a ngai a ni. Eng ang mi pawh ni la Pathianin a hmangaih reng che a, a ngaidam duh che. I rilru lungngaia rumin, beidawngin tap thin mahla, i beiseina chu bo rih mahse; thim chu a kiang ang, khua a la var dawn, Pathian hmel duhawm chu a lo eng ngei dawn a ni.

Ringtute beiseina chuan chhelna leh tumruhna a siam thin

Thuthlung thar kan chhiar ang khan rilrua rethei te chu an eng a thawl e, lungngaite chu an eng a thawl e, tiin chanchintha bu chuan min hrilh a. Tirhkoh Paula chuan Rom lehkhathawnah khan kan hrehawnaah pawh lawma awm turin min fuih a. Chu hrehawmna chuan chhelna min siam a ni. Pathian hmangaihna chu kan thinlunga a leih tawh avangin beiseina chuan min tih mualpho loh tur thu min hrilh a nih kha. Sadraka te, Mesaka te, Abednagoa te chuan he meipui ata min chhanchhuak dawn lo mahsela lal dang chibai an buk dawn loh thu huai takin an sawi a. Meipui sa pawh ti dai a, engmahloa chantirtu Pathianah rinna an nghat tlat a; englaimahin Pathian chu a fail ve ngai lo. Engzatah nge Pathian kan rin ngam ve dawn?

Tahna ruam kan zawh hi kan pa in panna lamlian a ni. Lungngaihna kan tawh changin tu nge min muan thei ang le? Harsatna kan tawh changin tuin nge min pui thei ang le? Beidawnna kan tawh changin tuin nge min hnem thiam ang le? Tahna ruam kan zawh changin tuin nge min hruai chhuak ang le? Kan mamawh chhanna chu engkima kan engkim Pathian chauh hi a ni. Kan nunah harsatna te a lo thleng thin a, lungngaihna hualvelin kan awm thin. Khawthimah khawnvar a eng angin, thim a chhah pauh leh eng a fiah thin. Pathiana kan innghah tlat chuan chak lova kan awmin a chak zia min hmuh tir thin a lo ni.

Thessalonika khuaa ringtu hmasa awmte chuan Isua Kristaa ‘beiseina’ an neih tlat avang chuan tihduhdahna leh tuarna hmunah pawh Pathian tan theihtawpin, thahnemngai tak leh chhel takin Pathian tan an thawk tlat thin thu kan hmu a, chumi avang chuan Tirhkoh Paula ngei pawh a lawm hle a, Pathian hnenah lawmthu a sawi hial reng a ni. (I Thes 1:1-3)

Hrehawmna kan tawrh zawngte hrethiam duh lovin,

Ka nawm sakna tur zawngin ka tlan fo thin a;

Mi dang tana malsawmna a lo ni reng si,

Ka tawrh hi Lalpan a phal vui thei ka ni lo.

Hrehawmna tin reng kan tuar chang hian hnung tawlha hawikir chang a va tam thin em! Mahse, Lalpa’n mi dang tana malsawmna ni thei turin kan tawrh a phal a lo ni zawk. Rinaa beiseina chuan tuarna zarah he khawvel hriat ngai loh muanna min pe zawk a ni. Pathian nen chuan engkim tih theih loh a awm lo. Harsatna hi pumpelh tum chi a ni lova Krista avanga huaisen taka hmachhawn tura intih paukhauh mai hi a fin thlak zawk. Fiahna paltlang lovin ringtu nun a puitling thei lo, a hman tlak ngai lo a ni.

Tlangkawmna

Awle, zaninah hian hei hi i hre thar leh ang u. He tahna ruam hi nangmah chauhin malin i zawh lo va, Kristian zawng zawngin an zawh a sin. Israel fate khan Jordan lui kha malin an dai kai lo. He lungngaihna hualvela i rumna thlaler atang hian Pathian chu beisei rawh. Isaia 40:31 ah “Lalpa nghaktute chuan an chakna an siam thar leh anga, mu angin thlain an thlawk ang a, hah lovin an tlan ang a, chau lovin an kal ang,” a ti a. He tahna ruamah hian nun chauin i rum thin maw? Beidawngin i tap thin maw? Pathian hi a reh vung vungin i hre thin em? Khawvel lungngaihna te leh buaina karah hian beidawng leh harsatna ten nitinin a bei che a, beidawng leh chauin i rum a tanpuitu i au thin ti raw? Zan khuaa tawngtaiin i chakna hmang zovin i rum maw? I tap thawmah I Lalpa a tho a sin. Pathian hi a thi lo va, a muhil hek lo. Tunge, Lalpa remruat dang zo awm le? Mihring ngaiha thil ni thei tawh lo, Ni li lai a liam hnuah pawh Lalzara chu a kai tho leh a nih kha. Chuvangin, Pathianah chauh innghat tlat la, Pathian chauh beisei tlat rawh. A muanga i ngaih lai hian Lalpa chu a awm mai mai lo a nia.

Khawvel thilah i innghat thin em? Khawvel thilte hian min hmangaih emaw kan ti a, mahse pathian dangte hian a tawp thlengin min hmangaih tak tak lo, kan mangan tak tak a, puih kan ngaih tak tak hunah an bo deih thin a ni. He khawvelin a pek theih loh chatuana nunna chu chang turin Pathian beisei rawh. Sam ziaktu in “Kei ka tan erawh zawng Pathian hnaih hi a tha a ni,” a ti. Keini teh hi chak loa kan awmin, manganga kan awmin, lungngaihna kan tawhin tunge kan belh thin le? Mi bawrhsawmte chuan doctor an ngai a, mi hrisel te chuanin an ngai lo. Zaninah hian i in checkup ang u. Dama kan inngaih lai hian natna vei kan nei ru reng thei a nia. Kan chhungkua kan dam tlang em? Ka thlarau a dam em? Damna duhin Bethesda dil, vantirhkohvin a rawn tih fawn hun nghakin i bel a, Mahse, i chaknain a tlin si lo. Kum 38 lai rei i nghak tawh a ni thei e. Damna duhin ring lo mi, sakhaw dang bia puithiamte i pan thin em ni? Gilead-ah thinghnai damdawi a lo em ni? Chutah chuan tidamtu a awm lo em ni? I lungngaih i buaina zawng zawng kha Gilead thinghnai damdawi hmanga tih dam theih a ni lo. Mosian thlalerah dar rul a khai kana tupawh a en apiang an dam ang khan kan damna Krista Kraw chauh i thlir ang u. Damna kan duh luatah te, kan hmanhmawh luatah te hian Pathian inpuanna hi kan nghak zo lova, Kalvari tlang thleng lo hian kan peng leh thin. Pathian beisei a nghak tlattute chuan a hmela damna famkim chu an chang thin a, chu chuan harsatna ruamah pawh lawm sawi hleih theih loh, tui nung lui chu an nunah lo thlengin, a lo luang chhuak thin a ni. Chu vang chuan, Engah nge i kun reng ni? Pathian beisei rawh. A hmelah damna awm kha. Ti chuan, amah chu I la fak ngei dawn a ni. Lalpan a thu malsawm rawh se. Amen.

(Dt. June 1, 2019 (Inrinni) Zan dar 7:45 inkhawma ka sermon a ni.)